Gastronomia

Comida familiar en la bolera de Casa Lola

Mio güela tola vida llevó'l chigre de Paxumal, “Casa Lola”. Siempre la voi recordar de mandil y al pie de la cocina de carbón. Hores y hores pa poner a disposición de los sos veceros los platos que-y dieron reputación: fabes, pitu caleya y arroz con lleche, ente otros. Too tan auténtico como ella, de la tierra y fecho con ciñu y dedicación. Ensin más ayuda que la de les sos manes y les de los parientes, sacó alantre a la familia, ¡qué más se pue pidir!. Caún garró'l so destín, el chigre zarró y con él tamién un poco'l pueblu.

Güei, que los recursos económicos son escasos y más que lo van a ser, nun podemos esperar por grandes soluciones. Hai qu'aprovechar y nun dexar pa prao toles oportunidaes, tres l'analís y la planificación necesaria, a lo local. Cola coordinación de les instituciones había que mirar más polo pequeño, polo nuestro, la micropyme que tenemos. Y la hostelería tamién.

Un exemplu podía ser el d'esos chigres nos pueblos, que tiren del comerciu, la ganadería, la llabranza o'l turismu. Y son el sitiu d'alcuentru ideal pa que los pueblos, evidentemente colos servicios que necesiten, sigan con xente.

Y d’otramanera, potenciar en condiciones toles xornaes gastronómiques que tenemos. Una manera cenciella, qu'engancha al que nos visita, mientres tol añu. La fabada en La Felguera, el pote d’antroxu en Sama, los callos en Ciañu, les cebolles rellenes en L´Entregu, los nabos en Sotrondio, los pimientos rellenos en Blimea, el cabritu en Llaviana, el pitu caleya y la trucha; la caza en Sobrescobiu, o la matanza’l gochu en Casu. Xunto colos concursos de pinchos y les xornaes de la sidra. Hai materia prima pa emponderar lo de casa, con parámetros de calidá y de cantidá, pue xenerase trabayu y actividá económica, cola riqueza de la nuestra mesa.

jmzapico@asturias.ccoo.es